İqtisadçı Rövşən Ağayev 2020-ci ilin dövlət büdcəsi layihəsinə əsaslanaraq bölgələri vergi gəlirlərinin adambaşına məbləği baxımından sıralayıb. Novator.az-ın məlumatına görə, ekspert yazır ki, 2020-ci ildə Vergilər Nazirliyinin xətti ilə 7 milyard 875 milyon manat toplanması nəzərdə tutulur, bunun 840 milyon manatı bölgələrin payına düşür: “Ölkə üzrə adambaşına illik orta vergi ödənişi proqnozu 792 manatdır. Bölgələrin əksəriyyəti üzrə bu göstərici 70-120 manat intervalında dəyişir.

2020-ci ildə Lerikdə adambaşına 33 manat, Cəlilabadda 40 manat, Yardımlıda 41 manat, Masallıda 49 manat, Goranboyda 53 manat, Ucar, Zərdab, Tərtərdə 56 manat, Ağdaş, Balakəndə 58 manat vergi ödənişi gözlənir.

Ən yüksək göstərici Bakıdadır – 3100 manat. Neft sektoru sayılmasa, məbləğ 2100 manata enir.

Naftalan üçün adambaşına illik vergi proqnozu 513 manat, Sumqayıt üçün 375 manat, Şirvan şəhəri üçün 266 manat, Mingəçevir üçün 256 manat, Abşeron üçün 247 manat, İmişli üçün 214 manat, Naxçıvan Muxtar Respublikası üçün 205 manat, Qəbələ üçün 199 manat, Göygöl üçün 192 manatdır”.