Paytaxtda tutulan cəbhəçiyə rayonda cəza verdilər
AXCP fəalı Müsahib Abbasov noyabrın 19-da 30 sutka inzibati həbs cəzası alıb. Novator.az-ın məlumatına görə, Neftçala Rayon Polis Şöbəsinin əməkdaşları onu Bakıda tutublar. Neftçalaya aparılan Müsahib Abbasov rayon məhkəməsinin qərarı ilə polisin qanuni tələbinə qəsdən tabe olmamaqda təqsirli bilinib.
Əslən neftçalalı olan Müsahib Abbasov Bakıda yaşayır, AXCP-nin Xətai rayon şöbəsində təmsil olunur.
AXCP həbsi fəalın siyasi fəaliyyəti ilə bağlayır.
Hazırda daha 5 cəbhəçi inzibati həbsdədir.
Demokratik Qüvvələrin Milli Şurasının oktyabrın 19-u Bakının mərkəzində keçirdiyi sanksiyasız aksiyaya görə tutulan AXCP üzvü İlham Hüseynə 60 sutka cəza verilib.
Milli Şura noyabrın 2-də də Bakıda sanksiyasız aksiya keçirmək niyyətində idi. Sonradan ləğv olunan aksiya ərəfəsində tutulan AXCP Ali Məclisi Rəyasət Heyətinin üzvü Fuad Qəhrəmanlıya, partiya fəalları Emin Manıyev, Aydın İsayev və Cavid İbrahimova 30 sutka inzibati həbs cəzası kəsilib.
