Müsavat əməliyyat xəbərlərinə münasibət bildirib
Almaniya polisi noyabrın 13-də ölkəyə mühacir daşıyanlara qarşı əməliyyat keçirib. İddialara görə, əməliyyat zamanı Azərbaycandan mühacir cəlb edənlər, o cümlədən müsavatçılar tutulub.
Müsavat Partiyasının 15 noyabr açıqlamasında qeyd olunur ki, Almaniyada həyata keçirilən əməliyyata, rəsmi məlumata görə, 510 polis cəlb edilib, 6 federal əyalət üzrə 38 obyektdə axtarış aparılıb: “Bu obyektlərdən yalnız 13-ü azərbaycanlılara məxsusdur. Əməliyyat çərçivəsində hər hansı Müsavat üzvünün saxlandığı barədə iddia təsdiq olunmayıb.
İddiaya görə, saxlananlar arasında Müsavatın Avropa Koordinasiya Mərkəzinin rəhbəri İlham Həsən, onun müavini kimi təqdim edilən Mehdi Xəlilbəyli, həmçinin fəallar Abdin Cavadov, Rəşad Məmmədov, Elşən Abdullayev olub.
İlham Həsənin saxlanması haqqında xəbər təkzib edilib. O, canlı yayımda verdiyi müsahibədə özünün və təşkilatın digər üzvlərinin saxlanması barədə xəbərin yalan olduğunu bildirib.
Mehdi Xəlilbəyli Müsavatın Avropa Koordinasiya Mərkəzində hər hansı vəzifə tutmur. Abdin Cavadov, Rəşad Məmmədov, Elşən Abdullayev isə Müsavat üzvləri deyillər. Onların saxlandıqlarını təsdiq edən hər hansı fakt da ortada yoxdur.
Müsavat Partiyası qanunsuz miqrasiya və saxta sənədlərin verilməsi ilə bağlı obyektiv araşdırmaların aparılmasında maraqlıdır. Almaniya polisinin həyata keçirdiyi əməliyyat nəticəsində Müsavat Partiyasının hər hansı üzvünün qanunsuz fəaliyyəti aşkar olunarsa, həmin şəxs(lər) buna görə fərdi məsuliyyət daşıyacaq. Müsavat Partiyası da bu halda həmin şəxs(lər)lə bağlı adekvat tədbirlər görəcək”.
Almaniyada icazəsiz yaşayan 61 nəfər Azərbaycan vətəndaşı noyabrın 14-də təyyarə ilə Azərbaycana qaytarılıb. Onların 22 nəfəri kişi, 18 nəfəri qadın, 21 nəfəri uşaqdır.
Bakının hava limanında Azərbaycan vətəndaşlarını Dövlət Miqrasiya Xidmətinin əməkdaşları qarşılayıb.
