Məhbus cəbhəçinin qızı “MedEra”da müalicə olunur
Həbsdə olan cəbhəçi, Qarabağ müharibəsi əlili Asif Yusiflinin qızı Esmira Yusifovanın səhhəti sabitləşib.
Şəkərdən əziyyət çəkən 1998-ci il təvəllüdlü Esmira Yusifova noyabrın 6-da ağır vəziyyətdə Bakıdakı 6 saylı Birləşmiş Şəhər Xəstəxanasına aparılıb. Həkimlər reanimasiya şöbəsinə yerləşdirilən xəstənin qanında şəkəri normaya sala biliblər.
Novator.az-ın əldə etdiyi məlumata görə, noyabrın 7-də Esmira Yusifova ailəsinin istəyi ilə paytaxtın 8-ci mikrorayonunda yerləşən “MedEra” hospitalına aparılıb, orada müalicə olunur, vəziyyəti yaxşıdır.
AXCP Ali Məclisi Rəyasət Heyətinin üzvü olan Asif Yusifli 2014-cü il noyabrın 25-dən həbsdədir. 2015-ci ildə məhkəmə onu dələduzluqda və sənədlərin saxtalaşdırılmasında təqsirli bilərək 7 il 6 ay müddətinə azadlıqdan məhrum edib. 2016-cı il mayın 4-də Ali Məhkəmə cəzanı 6 ilə, 2017-ci il martın 2-də 5 ilə endirib.
Bir çox yerli və beynəlxalq hüquq müdafiə təşkilatı Asif Yusiflini siyasi məhbus sayır.
