Vurğun dərgisi
Azərbaycan Demokratiya və Rifah Hərəkatı mərhum pedaqoq, alim, siyasətçi, ictimai xadim Vurğun Əyyubun xatirəsinə həsr olunmuş dərgi nəşr edib – “Bütün zamanların adamı”.
Novator.az bildirir ki, “Qanun” Nəşrlər Evində buraxılmış dərgidə Vurğun Əyyubun həyat yoldaşı və qızlarının, Azərbaycan Demokratiya və Rifah Hərəkatının sədri Qubad İbadoğlunun, həkim, ictimai-siyasi xadim Adil Qeybullanın, yazarlar Sabir Rüstəmxanlı, Firuz Mustafa, Şərif Ağayar, Elnur Astanbəyli, Ehtiram İlhamın, siyasətçilər Ədalət Yusub, Hüseyn Məlik, Səxavət Əlisoy, Rövşən Dəmirli, Məlahət Mürşüdlü, Ellada Məmmədlinin, jurnalistlər Cavid İsmayıl, Xalid Kazımlı, Çingiz Özgür, Səbuhi Sədəfin, təhsil eksperti Etibar Əliyevin, alim Ədalət Tağızadənin və başqalarının xatirələri yer alır.
Vurğun Əyyub 1957-ci ildə Tovuz rayonunun Aşağı Quşçu kəndində doğulub. Azərbaycan Dövlət Pedaqoji Universitetinin filologiya fakültəsini bitirib.
Sabirabad və Tovuz rayonlarında orta məktəbdə, Azərbaycan Dövlət Pedaqoji Universitetində, Türkiyənin Qars şəhərindəki Qafqaz Universitetində, Xəzər Universitetində dərs deyib.
Vurğun Əyyub Azərbaycan Xalq Cəbhəsinin qurucularından və liderlərindən biri olub. Əbülfəz Elçibəyin prezidentliyi dövründə (1992-1993-cü illər) yaradılmış Tələbə Qəbulu üzrə Dövlət Komissiyasına rəhbərlik edib.
1992-ci ildən Müsavat Partiyasının üzvü olub, baş katib, başqanın birinci müavini postlarını tutub.
2015-ci ildən Azərbaycan Demokratiya və Rifah Hərəkatı sədrinin birinci müavini olan Vurğun Əyyub 2019-cu il sentyabrın 24-də vəfat edib.
“Bütün zamanların adamı” dərgisi 1
“Bütün zamanların adamı” dərgisi 2
