Arxadayıq…
İqtisadçı ekspert Qubad İbadoğlu yeni şərh yayıb. Novator.az-ın məlumatına görə, o qeyd edir ki, Avropa Yenidənqurma və İnkişaf Bankı (AYİB) 2020-ci ilə Azərbaycanda 2,4 faiz iqtisadi artım proqnozlaşdırır: “Bu göstərici bizim İqtisadiyyat Nazirliyinin proqnozu ilə müqayisədə 0,6 faiz bəndi aşağıdır. Hökumətin proqnozu 3 faizdir.
2019-cu ilin yanvar-sentyabr aylarında Azərbaycanda ümumi daxili məhsul (ÜDM) 2,5 faiz artıb. Qeyri-neft sektoru üzrə 3,5 faiz artım qeydə alınıb.
Bu ilin sonuna 2,8 faiz iqtisadi artım gözlənir. AYİB-in proqnozuna əsaslansaq, gələn ilin iqtisadi artım tempi builkindən aşağı olacaq. Beləliklə, Azərbaycan keçmiş SSRİ məkanında autsayderlər sırasından çıxa bilməyəcək. AYİB 2020-ci il üçün Tacikistanda 6,3 faiz, Türkmənistanda 6 faiz, Özbəkistanda 5,8 faiz, Ermənistanda 5 faiz, Gürcüstanda 4,5 faiz, Moldovada 4 faiz, Qırğızıstanda 3,7 faiz, Qazaxıstanda 3,6 faiz, Ukraynada 3,5 faiz, Rusiyada 1,7 faiz, Belarusda 1,2 faiz ÜDM artımı gözləyir”.
