Yeni dollar qərarı
ABŞ-da mərkəzi bank funksiyasını yerinə yetirən Federal Ehtiyat Sistemi oktyabrın 30-da banklara verilən borc üzrə faiz dərəcəsinin – uçot dərəcəsinin yuxarı həddini 2%-dən 1,75%-ə düşürüb. Novator.az-ın məlumatına görə, bu, 2019-cu ildə dolların üçüncü ucuzlaşmasıdır. Əvvəlki qərarlarda da 0,25%-lik enmə qeydə alınıb. İyuldakı eniş 2008-ci ildən sonra ilk belə hal olub.
Azərbaycan Mərkəzi Bankının kommersiya banklarına manatla verdiyi borclar üzrə faiz dərəcəsi oktyabrın 25-dən 7,75%-dir.
Uçot dərəcəsi 2019-ci ilə 9,75%-lə başlayıb, fevralın 1-də 9,25%-ə, martın 15-də 9%-ə, aprelin 26-da 8,75%-ə, iyunun 7-də 8,5%-ə, iyulun 26-da 8,25%-ə, sentyabrın 13-də 8%-ə enib.
ABŞ dollarının rəsmi qiyməti 2018-ci il martın 7-dən 1,7 manatdır.
2015-ci il fevralın 21-də və dekabrın 21-də baş verən iki devalvasiya nəticəsində dolların rəsmi kursu 0,7862 manatdan 1,5594 manata qalxıb.
2016-cı ildə rəsmi qiymət 1,7707 manata çatıb, 2017-ci il dekabrın 13-dən 2018-ci il martın 7-dək dollar banklara 1,7001 manata təklif olunub.
