“İqtisadiyyatda illərdir yaranan problemləri tək iqtisadi addımlarla düzəltmək mümkün deyil”. Novator.az-ın məlumatına görə, Respublikaçı Alternativ Partiyasının icra katibi, iqtisadçı Natiq Cəfərli özünün “Facebook” səhifəsində belə yazır.

Ekspert qeyd edir ki, əhalinin kredit təşkilatlarına borcu bu ilin 9 ayında 1 milyard manata yaxın, 20 ayda isə 1,8 milyard manata yaxın artaraq 6 milyard 292 milyon manata çatıb: “Sentyabrın sonunda 14 milyard 243 milyon manatlıq kredit qoyuluşlarının 6 milyard 292 milyon manatını ev təsərrüfatlarına verilən kreditlər (istehlak kreditləri) təşkil edib.

2019-cu ilin yanvar-sentyabr ayları ərzində kredit təşkilatlarının cəmi kredit qoyuluşları 1 milyard 223 milyon manat olub və istehlak kreditləri 972 milyon manat, real sektora verilən kreditlər isə 251 milyon manat artıb.

Ölkə xəstə iqtisadi modeldən əl çəkə bilmir, kiçik həcmli iqtisadi böyümə ya büdcə xərcləri, ya da istehlak kreditləri hesabına baş verir. Bu model 2015-ci ildə ölkəni çökdürdü, devalvasiyaya və iqtisadiyyatın daralmasına, yoxsulluğun artmasına səbəb oldu, problemli kreditlər artdı, inflyasiya yüksəldi.

İndi də hökumət ölkəni eyni çuxura doğru aparır – vətəndaşın kredit yükü artır, borcu çoxalır, iqtisadiyyat büdcə xərclərinə və kreditlə artan ticarət dövriyyəsinə söykənir – amma söykəndiyi bu iki “divar” da çürükdür, kövrəkdir, hər an uçma təhlükəsi var.

Bu vəziyyət bir daha sübut edir ki, iqtisadiyyatda illərdir yaranan problemləri tək iqtisadi addımlarla düzəltmək mümkün deyil – idarəetmənin fəlsəfəsi, baxışı, yanaşması dəyişməsə, sistem islahatları olmasa, qanunun aliliyi təmin edilməsə, heç nə dəyişməyəcək”.