“Milli azlıqların bədii yaradıcılıq antologiyası”: növbəti təqdimat
Qəbələ rayonunda “Milli azlıqların bədii yaradıcılıq antologiyası” kitabının təqdimatı keçirilib.
Kitab Azərbaycan Yaradıcılıq Fondunun QHT-lərə Dövlət Dəstəyi Şurasının dəstəyi ilə reallaşdırdığı “Azərbaycanda yaşayan milli azlıqların söz yaradıcılıqları” layihəsi çərçivəsində çap olunub.
Təqdimat mərasimi oktyabrın 25-də Qəbələdəki Heydər Əliyev Mərkəzində olub.
Tədbiri giriş sözü ilə açan Azərbaycan Yaradıcılıq Fondunun təşkilat şöbəsinin rəhbəri Fuad Cəfərov kitab barədə oxuculara geniş məlumat verib. O, 2014-cü ildə ölkə başçısının sərəncamı əsasında Bakı Beynəlxalq Multikulturalizm Mərkəzinin yaradılması və qarşıya qoyulan hədəflər barədə iştirakçıları məlumatlandırıb.
Fuad Cəfərov Bakı Beynəlxalq Multikulturalizm Mərkəzinin Himayəçilər Şurasının sədri Kamal Abdullayevin və mərkəzin icraçı direktoru Rəvan Həsənovun Azərbaycan multikulturalizm modelinin xaricdə təbliği yolunda gördüyü işlərdən, qazanılan uğurlardan və qarşıda duran məsələlərdən danışıb.
Sonra Azərbaycan Yaradıcılıq Fondunun sədr müavini Rafiq Kaşanlı ölkəmizdə yaşayan azsaylı xalqların tarixi, mədəniyyəti, ədəbiyyatı, dini mənsubiyyəti barədə geniş çıxış edib. O, Azərbaycanda multikulturalizm siyasətinin uğurlarından söz açıb.
Tədbir iştirakçıları antologiyanı böyük maraqla qarşılayıblar.
Sonda Fuad Cəfərov tədbirin keçirilməsində göstərdiyi dəstəyə görə Prezident Administrasiyasına, QHT-lərə Dövlət Dəstəyi Şurasına, Bakı Beynəlxalq Multikulturalizm Mərkəzinə, Qəbələ Rayon İcra Hakimiyyətinə təşəkkürünü bildirib.
