Müsavat Məclisindəki boş yerlərə seçkinin nəticələri açıqlanıb.

Partiyanın 13 oktyabr qurultayında başqan, Məclisin sərbəst üzvləri və Mərkəzi Nəzarət-Təftiş Komissiyası seçilib.

Başqan seçkisində 2014-cü ildən bu postu tutan Arif Hacılı qələbə qazanıb, 33 nəfər Məclisə, 9 nəfər Mərkəzi Nəzarət-Təftiş Komissiyasına vəsiqə alıb. Məclisdə 27, Mərkəzi Nəzarət-Təftiş Komissiyasında 2 yer boş qalıb.

Yeni Məclisin 19 oktyabr iclasında 27 boş yerə seçki start götürüb, proses oktyabrın 20-də də davam edib. Bülletenə 54 namizədin adı daxil edilib. Gizli səsverməyə 71 Məclis üzvü qatılıb.

“Basta”nın məlumatına görə, 7 nəfər Məclis üzvü seçilib: Gülağa Aslanlı, Kərimxan Zeynalov, Əlipənah Rzalı, Fərid Hüseynli, Misir Məhəmmədoğlu, Rafiq İsmayıl, Dadaş Əhmədli.

Məclisdə 20 yer boş qalır. Bu yerlərə seçki növbəti sessiyalardan birində keçiriləcək.

Müsavat Məclisi yerli təşkilatların, Qadınlar, Gənclər qurumlarının sədrlərindən və qurultayda seçilmiş üzvlərdən ibarətdir. Partiya başqanı və sabiq başqan da Məclis üzvləridir.