Oktyabrın 21-də prezident İlham Əliyev Əli Həsənovu və Hacıbala Abutalıbovu baş nazirin müavini vəzifələrindən azad edib. Hər iki sərəncam istefa ərizələri əsasında imzalanıb.

Dövlət başçısı Əli Həsənovu və Hacıbala Abutalıbovu bu münasibətlə ayrı-ayrılıqda qəbul edərək onlarla vidalaşıb.

Novator.az bildirir ki, 1948-ci il təvəllüdlü Əli Həsənov 1997-ci ildən hökumətdə yer alıb. O, əvvəlcə Dövlət Ekologiya və Təbiətdən İstifadəyə Nəzarət Komitəsinin sədri olub, 1998-2018-ci illərdə baş nazirin müavini olmaqla yanaşı Qaçqınların və Məcburi Köçkünlərin İşləri üzrə Dövlət Komitəsinə sədrlik edib.

2018-ci ildən baş nazirə müavinlik edən Hacıbala Abutalıbov 2000-2001-ci illərdə də həmin vəzifəni tutub, 2001-2018-ci illərdə isə Bakı Şəhər İcra Hakimiyyətinin başçısı olub.

Hacıbala Abutalıbov 1944-cü ildə doğulub.