Bakının mərkəzində zorakılıq əleyhinə aksiya keçirilib
Oktyabrın 20-si bir qrup şəxs Bakının mərkəzində qadınlara qarşı zorakılığa etiraz olaraq aksiya keçirib.
“Turan”ın məlumatına görə, 50-60 nəfərə yaxın aksiya iştirakçısının əksəri xanımlar olub. Aksiyaya qadınlara qarşı zorakılığı pisləyən kişilər də qoşulublar.
Etirazçılar Xurşidbanu Natəvanın heykəli önündə toplaşıblar və “Zorakılıq qarşısında susma!”, “Qadınlara qarşı zorakılığa yox!”, “Selektiv abortlara yox!”, “Erkən nikahlara yox!” kimi şüarlar səsləndiriblər.
Yürüşə cəhd göstərsələr də polislər onların yolunu kəsib və plakatlarını cırmağa başlayıb. Bir neçə iştirakçı saxlanılıb. Bu, etirazçıları daha çox qəzəbləndirib və onlar saxlanılanlar sərbəst buraxılmadan getməyəcəklərini bildiriblər, “Saxlanılanları azad et!” şüarını səsləndirməyə başlayıblar.
Polis saxlananları sərbəst buraxandan sonra etirazçıların bir müddət şüar səsləndirməsinə və aksiyanın qətnaməsini oxumalarına da razılaşıb.
