Dövlət Statistika Komitəsi turizm göstəricilərini açıqlayıb. Novator.az bildirir ki, Dövlət Sərhəd Xidmətinə istinadla yayılan hesabata görə, 2019-cu ilin yanvar-sentyabr aylarında Azərbaycana 191 ölkədən 2 milyon 418,3 min və ya ötən ilin eyni dövrü ilə müqayisədə 9,5 faiz çox əcnəbi gəlib. Gələnlərin 30 faizi Rusiya, 22 faizi Gürcüstan, 9,7 faizi Türkiyə, 8,2 faizi İran, 3,9 faizi Səudiyyə Ərəbistanı, 2,1 faizi Birləşmiş Ərəb Əmirlikləri, 1,9 faizi Hindistan, qalanları digər ölkələrin vətəndaşları və vətəndaşlığı olmayan şəxslərdir.

Doqquz ayda xarici ölkələrə gedən Azərbaycan vətəndaşlarının sayı əvvəlki ilin müvafiq dövrü ilə müqayisədə 17,9 faiz artaraq 4 milyon 201,5 min nəfər olub. Ölkə vətəndaşlarının 36,3 faizi İrana, 29 faizi Gürcüstana, 17,5 faizi Rusiyaya, 11,8 faizi Türkiyəyə, 5,4 faizi digər ölkələrə gedib.

Başqa bir hesabata görə, yanvar-sentyabr aylarında Azərbaycan mehmanxanalarında 2 milyon 666,7 min gecələmə keçirilib, bu da ötən ilin eyni dövrü ilə müqayisədə 9 faiz çoxdur.

Gecələmələrin 55,7 faizi Bakının, 9,4 faizi Qəbələnin, 9 faizi Qubanın, 5,5 faizi Xaçmazın, 3,4 faizi Naftalanın, 2,8 faizi Qusarın, 2,5 faizi Naxçıvan Muxtar Respublikasının, 1,2 faizi Qaxın, qalanları digər bölgələrin payına düşüb.

Əcnəbilər və vətəndaşlığı olmayan şəxslərin keçirdiyi gecələmələrin sayı ümumi gecələmələrin 65,4 faizini təşkil edib.

Yanvar-sentyabr aylarında mehmanxanaların gəlirlərinin əvvəlki ilin eyni dövrü ilə müqayisədə 16,7 artaraq 334 milyon manat olduğu vurğulanır.