Oktyabrın 19-da Müsavat Partiyasının yenilənmiş Məclisinin ilk sessiyası keçirilib. İclasda ölkədəki ictimai-siyasi vəziyyət müzakirə olunub, Bakıda “Siyasi məhbuslara azadlıq”, “Repressiyalara son” və digər tələblərlə mitinq keçirilməsinə qərar verilib. Aksiya noyabrın 10-na təyin olunub.

Müsavat Məclisi yerli təşkilatların, Qadınlar, Gənclər qurumlarının sədrlərindən və qurultayda seçilmiş üzvlərdən ibarətdir. Partiya başqanı və sabiq başqan da Məclis üzvləridir.

Müsavatın 13 oktyabr qurultayında partiya başqanı, Məclisin sərbəst üzvləri və Mərkəzi Nəzarət-Təftiş Komissiyası seçilib.

Başqan seçkisində 2014-cü ildən bu postu tutan Arif Hacılı qələbə qazanıb.

33 nəfər Məclisə, 9 nəfər Mərkəzi Nəzarət-Təftiş Komissiyasına seçilmək üçün kifayət qədər səs yığıb. Məclisdə 27, Mərkəzi Nəzarət-Təftiş Komissiyasında 2 yer boş qalıb.

“Basta”nın məlumatına görə, Məclisin 19 oktyabr iclasında 27 boş yerə seçki start götürüb. Bülletenə 54 namizədin adı daxil edilib. Səsverməyə 62 Məclis üzvü qatılıb. Qeyd edilib ki, bir sıra Məclis üzvləri Demokratik Qüvvələrin Milli Şurasının 19 oktyabr aksiyası ilə əlaqədar rayon polis şöbələrinə aparılıb və sessiyaya gələ bilməyiblər. Bu səbəbdən səsvermə oktyabrın 20-si saat 10-dan 15-dək davam etdiriləcək.