ATƏT-in Minsk qrupunun həmsədrləri Endrü Skofer (ABŞ), Stefan Viskonti (Fransa), İqor Popov (Rusiya) və ATƏT sədrinin şəxsi nümayəndəsi Anjey Kasprşik oktyabrın 15-i Ermənistanın paytaxtı Yerevanda baş nazir Nikol Paşinyanla görüşüblər. Novator.az bildirir ki, görüşdə Dağlıq Qarabağ münaqişəsinin dinc həlli məsələlərinin, o cümlədən cəbhə xəttində atəşkəsin möhkəmləndirilməsi, Azərbaycan və Ermənistan xalqlarının sülhə hazırlanması üzrə səylərin müzakirə olunduğu açıqlanıb.
Həmsədrlərin Dağlıq Qarabağ bölgəsinə və Bakıya da baş çəkəcəkləri qeyd olunur.
1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Ermənistan Dağlıq Qarabağı (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) ələ keçirib.
Dağlıq Qarabağ münaqişəsinin dinc yolla tənzimlənməsi ilə məşğul olan ATƏT-in Minsk qrupu 1992-ci ildə yaradılıb. Bu quruma həmsədrlər ABŞ, Fransa, Rusiyadan əlavə Türkiyə, Belarus, İtaliya, Almaniya, İsveç, Finlandiya, eləcə də Azərbaycanla Ermənistan daxildir.
