Yeni hərbi obyektə baxış
Müdafiə naziri Zakir Həsənov oktyabrın 15-də Hərbi Hava Qüvvələrinin (HHQ) çoxməqsədli radiolokasiya stansiyasının (RLS) idarəetmə məntəqəsinin açılışında iştirak edib.
Mod.gov.az-ın məlumatına görə, nazirə məruzə edilib ki, RLS-in idarəetmə məntəqəsində yaradılan infrastruktur döyüş tapşırıqlarının vaxtında və dəqiq yerinə yetirilməsi üçün geniş imkanlar yaradıb. RLS həm stasionar, həm də taktiki şəraitdən asılı olaraq mobil qaydada istifadə edilə bilər.
İspaniya istehsalı olan və NATO standartlarına cavab verən RLS-in texniki imkanlarının nümayişi zamanı bildirilib ki, radiolokasiya vasitələri təyyarə, helikopter, pilotsuz uçuş aparatı və qanadlı raketlər kimi aerodinamik hava obyektlərinin aşkarlanması, uçuş parametrlərinin təyin edilməsi və müşayiətə götürülməsini təmin edir.
Müdafiə naziri ərazidə yerləşən qərargah, əsgər yataqxanası, yeməkxana, əşya anbarı, tibb məntəqəsi, camaşırxana, qazanxana, xidməti və inzibati otaqlar, eləcə də digər qurğu və avadanlıqlara baxış keçirib.
