Tikintiyə nəzarət: nələr üzə çıxıb?
Əmək Münasibətlərinin Monitorinqi Mərkəzi səyyar monitorinqlərin hesabatını verib.
Prezidentin 28 aprel 2017-ci il fərmanı ilə Vətəndaşlara Xidmət və Sosial İnnovasiyalar üzrə Dövlət Agentliyinin nəzdində yaradılan Əmək Münasibətlərinin Monitorinqi Mərkəzi tikinti sahəsində əmək münasibətlərinin rəsmiləşdirilməsinə nəzarət edir.
Oktyabrın 11-də keçirilən mətbuat konfransında danışan Əmək Münasibətlərinin Monitorinqi Mərkəzi müdirinin müavini Murad Fətullayev deyib ki, indiyə qədər 158 monitorinqdə 6120 nəfər yoxlanıb, 1185 nəfərin əmək və ya xidməti müqavilə olmadan işə cəlb edildiyi aşkara çıxıb.
AZƏRTAC-ın məlumatına görə, Murad Fətullayev qeyd edib ki, son 2 ildə Bakı şəhərində tikilməkdə olan çoxmənzilli yaşayış binalarında aparılan monitorinqlər öz müsbət nəticəsini verir: “Monitorinqlər başlandığı ərəfədə çoxmənzilli yaşayış binalarının inşası ilə məşğul olan işçilərin 34 faizi rəsmi qeydiyyat olmadan çalışırdısa, hazırda bu göstərici 5 faizə qədər azalıb. Yalnız işəgötürənlər üzrə monitorinqlərdən sonra 78 min 663 əmək müqaviləsi imzalanıb.
Bir podratçı şirkət 2017-ci ilin sonunda orta hesabla rəsmi qeydiyyata alınmış 35 işçiyə malik idisə, hazırda bu göstərici 70 işçi təşkil edir.
Əmək və ya xidməti müqavilə olmadan işçi cəlb edən işəgötürənlərdən 90-ı inzibati cərimə və ya maliyyə sanksiyasına məruz qalıb. 4 işəgötürən üzrə əməldə cinayət tərkibinin olması bilinib və müxtəlif cəza və cərimə tədbirləri həyata keçirilib. Qeydə alınmış pozuntu halları üzrə ümumilikdə 1,5 milyon manat məbləğində cərimə və sanksiya tətbiq olunub”.
