Oktyabrın 11-də Norveç Nobel Komitəsi 2019-cu ilin sülh mükafatı laureatının adını açıqlayıb. Novator.az bildirir ki, Nobel sülh mükafatı Efiopiyanın baş naziri Abiy Əhməd Əliyə verilib.

Baş nazirin bölgədə sülhün tənzimlənməsinə verdiyi töhfəyə görə mükafatlandırıldığı bildirilir, Abiy Əhməd Əlinin Eritreya ilə sülh müqaviləsinin bağlanmasında xidməti vurğulanır.

1976-cı il təvəllüdlü Abiy Əhməd Əli baş nazir postunu 2018-ci ilin aprel ayından tutur.

Nobel mükafatının məbləği 9 milyon İsveç kronudur (1,5 milyon manat).

2019-cu ilin fiziologiya və tibb üzrə Nobel mükafatını Uilyam Kelin, Qreqq Semenza (hər ikisi ABŞ) və Peter Ratkliff (Böyük Britaniya), fizika üzrə Nobel mükafatını Ceyms Piblz (Kanada və ABŞ), Didye Keloz və Mişel Mayor (hər ikisi İsveçrə), kimya üzrə Nobel mükafatını Con Qudenaf (ABŞ), Stenli Uittinqhem (Böyük Britaniya) və Akira Yoşino (Yaponiya) alıb.

2018-ci ilin ədəbiyyat üzrə Nobel mükafatına polşalı şairə Olqa Tokarçuk, 2019-cu ilin Nobel mükafatına isə avstriyalı yazıçı Peter Handke layiq görülüb.

Səidə Hüseynova