Azərbaycanın Xarici İşlər Nazirliyi oktyabrın 11-də bəyanat yayaraq Türkiyənin Suriyada həyata keçirdiyi hərbi əməliyyatlara münasibət bildirib. Bəyanatda deyilir: “Azərbaycan terrorizmin bütün forma və təzahürlərini qəti şəkildə pisləyir və beynəlxalq ictimaiyyətin terrorizmə qarşı mübarizədə səylərini dəstəkləyir. Bu mənada biz əminik ki, Türkiyə hökumətinin bəyan etdiyi kimi, Türkiyə Silahlı Qüvvələrinin həyata keçirdiyi “Sülhün mənbəyi” əməliyyatı Suriyanın ərazi bütövlüyü çərçivəsində terror riskinin aradan qaldırılmasına, qaçqınların öz evlərinə qayıtmasına, humanitar problemlərin həll edilməsinə, sülh və sabitliyin təmin edilməsinə xidmət edəcək”.

Oktyabrın 9-dan Türkiyə Silahlı Qüvvələri Suriyanın şimalında möhkəmlənmək istəyən kürd separatçılarına qarşı hərbi əməliyyat aparır. İndiyə qədər 342 terrorçunun öldürüldüyü, 11 kəndin terrorçulardan təmizləndiyi bildirilir.

Suriyada 2011-ci ilin mart ayında Əsəd sülaləsinin hakimiyyətdən getməsi tələbi ilə başlayan xalq hərəkatı sonradan vətəndaş müharibəsinə çevrilib. Ölkənin Türkiyə ilə sərhəd bölgələrinə nəzarət kürd yaraqlılarının nəzarətinə keçib. Onlar Türkiyədəki kürd separatçılarına dəstək verirlər.