Litium-ion batareyalarını yaradanlara Nobel mükafatı verildi
Oktyabrın 9-da 2019-ci ilin kimya üzrə Nobel mükafatı laureatları açıqlanıb. Novator.az-ın məlumatına görə, İsveç Elmlər Akademiyasının Nobel komitəsi mükafatın litium-ion batareyalarını yaradan alimlər Con Qudenaf (ABŞ), Stenli Uittinqhem (Böyük Britaniya) və Akira Yoşinoya (Yaponiya) verildiyini bəyan edib.
Mükafatın məbləği 9 milyon İsveç kronudur (1 kron 17 qəpikdir).
Enerjini uzun müddətə saxlamaq gücü ilə tanınan litium-ion batareyalarından noutbuk, mobil telefon, elektromobillərin istehsalında da istifadə olunur.
2019-cu ilin fiziologiya və tibb üzrə Nobel mükafatına Uilyam Kelin, Qreqq Semenza (hər ikisi ABŞ) və Peter Ratkliff (Böyük Britaniya), fizika üzrə Nobel mükafatına Ceyms Piblz (Kanada və ABŞ), Didye Keloz və Mişel Mayor (hər ikisi İsveçrə) layiq görülüblər.
