Müsavatın qurultay üçün yer müraciətinə cavab verildi
Bakı Şəhər İcra Hakimiyyəti Müsavat Partiyasının 9-cu qurultayına yer ayrılması ilə bağlı müraciətini cavablandırıb. Novator.az-ın məlumatına görə, meriyanın rəsmi cavabında sahibi ilə müvafiq razılıq əldə ediləcəyi təqdirdə qurultayın oktyabrın 12-si 7-ci mikrorayondakı “Büllur” şadlıq sarayında keçirilməsinə etiraz olunmadığı vurğulanıb.
Ancaq Bakı Şəhər İcra Hakimiyyətinin rəsmi cavabı açıqlanandan az sonra “Büllur” şadlıq sarayının müsavatçılara yer ayırmaqdan imtina etdiyi bilinib.
Müsavat Partiyası Bakı Şəhər İcra Hakimiyyətinə müraciətində 400-500 nəfərlik yer ayrılmasını istəmiş, Rəşid Behbudov adına Dövlət Mahnı Teatrının və Abbas Mirzə Şərifzadə adına Mədəniyyət Evinin daha münasib olduğunu bildirmiş, sonradan şadlıq saraylarının birində də qurultay keçirməyə hazır olduğunu bəyan etmişdi.
Qurultayda partiya başqanı, Məclisin sərbəst üzvləri və Mərkəzi Nəzarət-Təftiş Komissiyası seçilməlidir.
Başqan postuna partiyanın indiki lideri Arif Hacılı və Divan üzvləri Tofiq Yaqublu ilə Yadigar Sadıqov namizəddir.
1911-ci ildə yaradılan Müsavatın ilk başqanı Məhəmməd Əmin Rəsulzadə, ikinci başqanı Mirzə Bala Məmmədzadə, üçüncü başqanı Kərim Odər, dördüncü başqanı Məhəmməd Azər Aran olub.
Sovet hakimiyyəti illərində mühacirətdə fəaliyyət göstərən partiya 1992-ci ildə Bakıda keçirilən 3-cü qurultayda bərpa olunub, o vaxtdan 2014-cü ilədək Müsavata İsa Qəmbər başqanlıq edib.
2014-cü ilin sentyabrında keçirilən 8-ci qurultayda başqan vəzifəsinə Arif Hacılı seçilib.
