İnternetlə alınan bilet dəmiryolda haçan maneəsiz işləyəcək?
Dəmiryol sistemində internetlə bilet satışı tətbiq edilsə də, onlayn üsulla bilet alanlardan qatarın çıxmasına azı 1 saat qalmış kassadan kağız bilet almaq da tələb olunur. Novator.az onlayn bilet sistemində kassadan bilet alınması şərtinin nə ilə əlaqədar olması ilə maraqlanıb.
Sentyabrın 27-də “Azərbaycan Dəmir Yolları” QSC-nin mətbuat katibliyi şöbəsindən bildiriblər ki, dəmir yolu daşımalarında istifadə edilən biletlər ciddi hesabat blankı hesab olunur: “Bu baxımdan, qanunvericiliyə əsasən, onların kağız üzərində tətbiqi zəruridir. Lakin 2019-cu ilin mart ayında Nazirlər Kabineti müəssisə və təşkilatların, habelə sahibkarlıqla məşğul olan fiziki şəxslərin iş xüsusiyyətlərinə uyğun olaraq ciddi hesabat blanklarının tərtibi və tətbiqi qaydalarına dəyişiklik edib. Yenilik “Azərbaycan Dəmir Yolları”nın Sərnişin Daşımaları üzrə Avtomatlaşdırılmış İdarəetmə Sisteminin çıxarışlarının uçotu qaydalarının təsdiq edilməsini də nəzərdə tutur. Həmin qaydaların ərsəyə gəlməsi nəticəsində elektron biletlərin ciddi hesabat blankı kimi qəbul edilməsi və elektron qaydada uçotunun aparılması mümkün olacaq. Nəticədə sərnişin elektron qaydada alınmış bileti kassaya yaxınlaşmadan bələdçilərə təqdim etməklə qatara minə biləcək.
“Azərbaycan Dəmir Yolları” elektron biletlərin uçotu ilə bağlı qaydaları hazırlayaraq təsdiq olunması üçün aidiyyəti dövlət orqanına göndərib. Həmçinin elektron biletlərin tətbiqi ilə bağlı müvafiq proqram təminatının təkmilləşdirilməsi istiqamətində intensiv iş aparılır. Yaxın vaxtlarda pilot layihə olaraq Bakı-Gəncə sürət qatarında elektron bilet satışı tətbiq ediləcək. Gələcəkdə isə elektron biletlərin bütün qatarlarda tətbiq edilməsi nəzərdə tutulur.
Həmçinin sərnişinlərin rahatlığı üçün elektron biletlərin internetdən əldə edilməsi işində səmərəliliyin artırılması məqsədilə mobil əlavə hazırlanır. Bununla yanaşı vağzallarda xüsusi terminalların da quraşdırılması planlaşdırılıb, bu da biletlərin kassada növbə gözləmədən alınmasına imkan yaradacaq”.
Səidə Hüseynova
