Gürcüstanın turizm gəlirləri necə dəyişib?
Gürcüstanın Milli Bankı ölkənin turizmdən gəlirlərini açıqlayıb. Novator.az-ın məlumatına görə, hesabatda bildirilir ki, avqustda ölkənin turizm gəlirləri 2018-ci ilin avqust ayı ilə müqayisədə 10,6% azalaraq 396,1 milyon ABŞ dollarına düşüb.
Avqustda ölkəyə 1,3 milyon turistin gəldiyi qeyd olunur.
Milli Bankın icmalına əsasən, ölkə yanvar-avqust aylarında turizmdən 2,2 milyard dollardan çox gəlir götürüb. Bu, 2018-ci ilin eyni dövrünə nisbətdə 4,1% yuxarı göstəricidir.
8 ayda ölkəyə 6 milyon 216 min turistin gəldiyi vurğulanır.
Turizm sahəsində gəlirlər iki aydır azalıb. İyul ayında 13,3% düşmə qeydə alınmışdı.
Bu ilin yayında Gürcüstanla Rusiyanın münasibətləri daha da pisləşib. İyulun 8-dən Rusiyadan Gürcüstana birbaşa təyyarə uçuşları və turizm operatorlarının bu ölkəyə səfərləri üçün müraciətlər dayandırılıb.
Gürcüstanın Abxaziya və Cənubi Osetiya bölgələri 1990-cı illərin əvvəlindən özünü müstəqil dövlət elan etmiş rejimlərin əlindədir. 2008-ci ildə Rusiya Abxaziya və Cənubi Osetiyanı işğal edərək onları müstəqil dövlətlər kimi tanımaq qərarı verib. Hər iki bölgədə Rusiyanın hərbi bazaları var.
Bu il iyunun 20-si Gürcüstan parlamentində Pravoslav Parlamentlərarası Assambleyasının sessiyası keçirilib. Tədbirə Rusiya Dövlət Dumasının kommunist deputatı Sergey Qavrilovun sədrlik etməsi müxalif deputatların sərt etirazına səbəb olub, onlar beynəlxalq tədbiri yarımçıq dayandırıblar. Müxaliflər etirazı Sergey Qavrilovun Gürcüstanın ərazi bütövlüyünə qarşı təcavüzdə iştirakı ilə əsaslandırıblar.
Bu hadisə Moskvanın Gürcüstana sanksiyalar tətbiq etməsi ilə nəticələnib.
Səidə Hüseynova
