Dünya əhalisinin 3,5 faizi mühacirdir
BMT mühacirlərlə bağlı hesabat yayıb. Novator.az-ın məlumatına görə, hesabatda bildirilir ki, 2010-cu ildən bəri dünyada mühacirlərin sayı 51 milyon nəfər çoxalaraq 272 milyon nəfərə çatıb.
Mühacirlərin dünya əhalisinin 3,5%-ni təşkil etdiyi vurğulanır. 2000-ci ildə bu göstərici 2,8% olub.
Hesabata əsasən, mühacirlərin ən çox üz tutduğu qitə Avropadır: 82 milyon insan.
İkinci yerdə Şimali Amerika (59 milyon insan), üçüncü yerdə Qərbi Asiya (49 milyon insan) gəlir.
Mühacirlərin yarısından çoxu 10 ölkədə yaşayır. ABŞ-da 51 milyon, Almaniya və Səudiyyə Ərəbistanının hərəsində 13 milyon, Rusiyada 12 milyon, Böyük Britaniyada 10 milyon, Birləşmiş Ərəb Əmirliklərində 9 milyon, Fransa, Kanada və Avstraliyanın hərəsində 8 milyon, İtaliyada 6 milyon mühacir var.
Mühacirlərin 18 milyon nəfəri Hindistan vətəndaşıdır. Meksikalıların 12 milyon nəfəri, çinlilərin 11 milyon nəfəri, rusiyalıların 10 milyon nəfəri, suriyalıların 8 milyon nəfəri mühacirətdədir.
Səidə Hüseynova
