2019-cu il sentyabrın 1-nə Azərbaycanda iqtisadi fəal əhalinin sayı 5 milyon 191,2 min nəfər olub, onların 4 milyon 939,1 min nəfərini məşğul əhali təşkil edib. Novator.az-ın məlumatına görə, Dövlət Statistika Komitəsi belə hesabat yayıb.

Avqustun 1-nə muzdla işləyənlərin sayı 1 milyon 613,8 min nəfər göstərilib, iqtisadiyyatın neft sektorunda 34,7 min nəfərin, qeyri neft-qaz sektorunda 1 milyon 579,1 min nəfər çalışdığı vurğulanıb.

Hesabata əsasən, sentyabrın 1-nə məşğulluq xidməti orqanları 70,9 min nəfəri işsiz kimi qeydiyyata alıb, işsizlikdən sığorta ödənişinin orta məbləği 233,5 manat olub.

Sığorta ödənişi işçinin sığorta stajından asılı olaraq onun itirilmiş orta aylıq əməkhaqqının məbləğinə müəyyən faiz dərəcələri tətbiq olunmaqla hesablanır. İşçinin sığorta stajı 3 ildən 5 ilə qədər olduqda onun itirilmiş orta aylıq əməkhaqqının məbləğinin 50%-i, sığorta stajı 5 ildən 10 ilə qədər olduqda 55%-i, sığorta stajı 10 ildən yuxarı olduqda 60%-i məbləğində işsizliyə görə aylıq sığorta ödənişi verilir.