2020-ci ilin büdcəsi: 1,1 milyard manat kəsir proqnozlaşdırılır
Maliyyə Nazirliyi 2020-ci ilin dövlət büdcəsinin ilkin rəqəmlərini açıqlayıb. Novator.az-ın məlumatına görə, layihədə gəlirlər 24 milyard 484 milyon manat, xərclər 25 milyard 617,7 milyon manat göstərilir, 1 milyard 133,7 milyon manat kəsir proqnozlaşdırılır.
Hesabata əsasən, büdcə gəlirləri hesablanarkən neftin bir barrelinin qiyməti 55 ABŞ dollarından götürülüb.
2019-cu ilin dövlət büdcəsinin gəlirləri 23 milyard 168 milyon manat, xərcləri 25 milyard 190 milyon manat məbləğində təsdiqlənib. Neftin bir barrelinin qiyməti 60 dollar hesablanıb.
2019-cu ilin yanvar-iyul aylarında büdcə 12 milyard 526,5 milyon manat gəlir əldə edib, büdcədən 13 milyard 102,7 milyon manat xərclənib, büdcənin icrasında 576,2 milyon manatlıq kəsir yaranıb.
2019-cu ilin yanvar-avqust ayları üzrə gəlirlər 14 milyard 810,3 milyon manat, xərclər 14 milyard 712,1 milyon manat göstərilir, büdcənin icrasında 98,2 milyon manat artıqlıq yarandığı vurğulanır.
