Xədicə İsmayılın şikayəti üzrə hazırlıq iclası keçirilib
Sentyabrın 13-də Bakı Apellyasiya Məhkəməsində jurnalist Xədicə İsmayılın şikayəti üzrə hazırlıq iclası keçirilib.
1976-cı ildə Bakıda anadan olan Xədicə İsmayıl 1997-ci ildə Bakı Dövlət Universitetini bitirib. Jurnalist fəaliyyətinə “Günaydın” qəzetində başlayıb, bir sıra KİV-lərdə, o cümlədən “Zerkalo”, “Exo” qəzetlərində, “Amerikanın səsi” radiosunda çalışıb. 2008-ci ildən “Azadlıq” radiosunda işləyib. 2008-2010-cu illərdə radionun Bakı bürosuna rəhbərlik edib.
Xədicə İsmayıl 2014-cü il dekabrın 5-dən 2016-cı il mayın 25-dək həbsdə olub. Bakı Ağır Cinayətlər Məhkəməsi onu 7 il 6 ay azadlıqdan məhrum edib, sonradan Ali Məhkəmə 3 il 6 ay cəza kəsərək həmin müddətin şərti sayılmasına qərar verib. Daha sonra isə bu müddət 2 il 3 aya endirilib.
Xədicə İsmayıla həbs cəzası verilərkən ona 5 illik sınaq müddəti də təyin olunub. Sınaq müddəti 2015-ci il noyabrın 25-dən hesablanır.
Sınaq müddəti Xədicə İsmayılın hər ay Binəqədi Rayon İcra və Probasiya Şöbəsində qeydiyyatdan keçməsini nəzərdə tutur və onun xaricə çıxışını qadağan edir.
Jurnalist sınaq müddətinin çox hissəsini çəkdiyini bildirərək qalan müddətin ləğv olunması üçün Binəqədi Rayon Məhkəməsinə müraciət edib. 2019-cu il avqustun 9-da məhkəmə jurnalistin istəyini təmin etməyib, yəni sınaq müddətinin qalan hissəsi ləğv olunmayıb. Nəticədə Xədicə İsmayıl apellyasiya şikayəti verib.
“Turan”ın məlumatına görə, sentyabrın 13-də Bakı Apellyasiya Məhkəməsində jurnalistin şikayəti üzrə keçirilən hazırlıq iclasında qərara alınıb ki, işə ayın 20-də baxılsın.
