Pensiya: real və gözlənən artımlar
2019-cu il oktyabrın 1-dən əmək pensiyasının minimum məbləği 200 manat müəyyən olunur. Hazırda minimum pensiya 160 manatdır. Məbləğ artımının 660 min pensiyaçını əhatə edəcəyi açıqlanıb.
Pensiyanın minimum məbləği 2019-cu il martın 1-dən 116 manatdan (bir sıra kateqoriyalar üzrə 80 manatdan) 160 manata çatdırılıb. Əmək və Əhalinin Sosial Müdafiəsi Nazirliyinin hesabatına əsasən, artımdan 233 min pensiyaçı yararlanıb.
2019-cu il iyulun 1-nə Dövlət Sosial Müdafiə Fondunda 1 milyon 291,3 min nəfər pensiyaçı qeydiyyatda olub. Aylıq pensiyaların orta məbləği 232,3 manat göstərilib.
Novator.az bildirir ki, “Əmək pensiyaları haqqında” qanunda yeniliyə görə, pensiyaların indeksləşdirilməsi qaydası dəyişib.
2018 və 2019-cu illərdə əmək pensiyaları orta aylıq nominal əməkhaqqının artım tempinə uyğun indeksləşdirilib. Proses Dövlət Statistika Komitəsindən Əmək və Əhalinin Sosial Müdafiəsi Nazirliyinə təqdim olunan rəsmi bilgi əsas götürülməklə həyata keçirilib.
2020-ci ildən əmək pensiyasının sığorta hissəsi orta aylıq nominal əməkhaqqının illik artım tempinə uyğun indeksləşdiriləcək. Sığortaolunanların fərdi hesabının sığorta hissəsində qeydə alınan pensiya kapitalını isə istehlak qiymətləri indeksinin illik səviyyəsinə uyğun indeksləşdirmək qərara alınıb.
Dövlət Statistika Komitəsinin hesabatına əsasən, 2019-cu il avqustun 1-nə Azərbaycan iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 8,4 faiz artıb.
2019-cu ilin yanvar-avqust aylarında istehlak məhsulları və xidmətlərin isə 2018-ci ilin eyni dövrünə nisbətən 2,6 faiz bahalaşdığı açıqlanıb.
