Büdcədən büdcəyə
Maliyyə Nazirliyinin rəsmi hesabatına görə, 2019-cu ilin yanvar-iyul aylarında dövlət büdcəsinə 12 milyard 435,5 milyon manat vəsait daxil olub, büdcədən 13 milyard 102,7 milyon manat vəsait xərclənib, 667,2 milyon manatlıq kəsir yaranıb.
Novator.az bildirir ki, 2019-cu ilin dövlət büdcəsinin gəlirləri 23 milyard 168 milyon manat, xərcləri 25 milyard 190 milyon manat məbləğində təsdiqlənib.
Sentyabrın 9-da isə Maliyyə Nazirliyində 2020-ci ilin icmal və dövlət büdcəsi layihələrinə baxılıb. Kollegiya iclasında çıxış edən nazir Samir Şərifov deyib ki, layihələr iqtisadi və sosial inkişaf prioritetləri, büdcə sistemi qanunvericiliyinin tələbləri, qlobal iqtisadiyyatda gedən proseslər, onların ölkə iqtisadiyyatına mümkün təsirləri, İqtisadiyyat Nazirliyinin proqnozları, dövlət maliyyə sisteminin qarşısında duran çağırışlar nəzərə alınmaqla hazırlanıb: “Layihələrin əsas parametrlərinə Maliyyə Sabitliyi Şurasında da baxılıb. İlk növbədə 2020-ci il və sonrakı üç ilin icmal və dövlət büdcələrinin büdcə qaydası əsasında hazırlanması, dövlət büdcəsinin gəlir və xərclərinin hesablanması zamanı neftin bir barrelinin orta illik qiymətinin ortamüddətli dövrə şamil edilməsi, xərclərin yuxarı həddinin təsdiq olunması və qeyri-neft baza kəsirinin ardıcıl sürətdə azaldılması ilə bağlı qərarlar qəbul edilib”.
Maliyyə Nazirliyi layihələri bəyənərək Nazirlər Kabinetinə təqdim olunması qərarı qəbul edib.
Maliyyə Sabitliyi Şurasının sədri postunu prezidentin iqtisadi siyasət və sənaye məsələləri üzrə köməkçisi-şöbə müdiri tutur. Şuranın üzvləri bu postları tutan şəxslərdir: prezidentin aqrar siyasət məsələləri üzrə köməkçisi-şöbə müdiri; birinci vitse-prezidentin iki köməkçisi; maliyyə naziri; iqtisadiyyat naziri; Mərkəzi Bankın sədri; Maliyyə Bazarlarına Nəzarət Palatasının İdarə heyətinin sədri; Dövlət Neft Fondunun icraçı direktoru.
