Nazirlik Əmək Məcəlləsinə dəyişiklik təklif edir
Əmək və Əhalinin Sosial Müdafiəsi Nazirliyi Əmək Məcəlləsində dəyişikliklər layihəsi hazırlayıb. Rəsmi məlumata görə, məcəlləyə “Ailə vəzifələri olan işçi” adlı yeni anlayış təklif olunur. Bu anlayış himayəsində olan uşaqlarla, eləcə də həkim məsləhət komissiyasının rəyinə əsasən qulluğa və köməyə həqiqətən ehtiyacı olan digər ailə üzvləri (atası, anası, babası, nənəsi, əri (arvadı), uşaqları (o cümlədən övladlığa götürülənlər), doğma və ögey bacıları və qardaşları, nəvələri, ərinin (arvadının) valideynləri, qardaşları, bacıları ilə münasibətdə ailə vəzifələri olan kişi və qadın işçi kimi təqdim edilir.
Başqa bir yenilik əmək münasibətlərində digər amillərlə yanaşı “ailə vəzifələri” amilinə görə də ayrı-seçkiliyə yol verilməsinə yasaq nəzərdə tutur.
Açıqlamaya əsasən, dəyişiklikdə məqsəd milli qanunvericiliyin Beynəlxalq Əmək Təşkilatının “Kişi və qadın işçilər – ailə vəzifələri olan işçilər üçün bərabər imkanlar və bərabər rəftar haqqında” konvensiyasına uyğunluğunu təmin etməkdir.
