Hara gedir, harada xərcləyirlər?
“Mastercard” şirkəti turistlərin ən çox hansı şəhərlərə səfər edib pul xərcləməsini analiz edib.
Novator.az-ın məlumatına görə, tədqiqat göstərib ki, 2018-ci ildə xaricilərin ən çox səfər etdiyi şəhər Tailandın paytaxtı Banqkok olub. Bu şəhəri il ərzində 22 milyon turist ziyarət edib.
İkinci və üçüncü yerlərdə Fransa və Böyük Britaniyanın baş şəhərləri Parislə London qərar tutur. Ötən il bu şəhərlərin hər biri 19 milyondan çox turist qəbul edib.
Turistlər üçün ən populyar şəhərlərin siyahısında Dubay (Birləşmiş Ərəb Əmirlikləri), Sinqapur, Kuala-Lumpur (Malayziya), Nyu-York (ABŞ), İstanbul (Türkiyə), Tokio (Yaponiya) və Antalya da (Türkiyə) var.
2018-ci ildə səyahətçilərin xərcləri baxımından lider şəhər Dubaydır: orada turistlər gündə orta hesabla 553 ABŞ dolları xərcləyiblər.
Məkkə (Səudiyyə Ərəbistanı) şəhəri ikinci, Banqkok üçüncüdür.
Səidə Hüseynova
