Xətai Rayon Məhkəməsi Bakupress.az saytının təsisçisi və baş redaktoru Şəfəq Ağacanın həbs müddətini 2 ay uzadıb. APA-nın 3 sentyabr məlumatına görə, qərar istintaq orqanının vəsatəti əsasında çıxarılıb.
Şəfəq Ağacan mayın 1-i Bakıda tutulub. Mayın 3-də Xətai Rayon Məhkəməsi jurnalist barəsində həbs qətimkan tədbiri seçib.
Polisin Şəfəq Ağacanı paytaxtın Nərimanov rayonunda, 5 saylı xəstəxananın qarşısında narkotik satarkən tutduğu açıqlanıb. Məlumata görə, Şəfəq Ağacan çəkisi 311 qramdan çox olan qurudulmuş marixuananı 100 ABŞ dolları və 1830 manata satarkən yaxalanıb.
Bakı İstintaq Təcridxanasında saxlanan jurnalist ittihamları qəbul etmir, şərləndiyini deyir.
Novator.az bildirir ki, 1976-cı il təvəllüdlü Şəfəq Ağacan Sumqayıtdakı 27 saylı orta məktəbin məzunudur. Bakı Slavyan Universitetini filoloq ixtisası ilə bitirib.
