Gənc fəal Rəfael Hüseynzadə bu ilin iki ayını həbsdə olub. İndi o, daha bir ayını həbsdə keçirə bilər.

Sentyabrın 3-də Abşeron Rayon Məhkəməsi ona 30 sutka inzibati həbs cəzası kəsib.

Fəalın atası Füzuli Hüseynov “Amerikanın səsi”nə deyib ki, oğlunu polis şöbəsinin qarşısında səs-küy salaraq ictimai qaydanı pozmaqda təqsirli biliblər.

Rəfael Hüseynzadə bu il yanvarın 25-də siyasi məhbusların azadlığa buraxılması tələbi ilə paytaxtda təkbaşına etiraz aksiyası keçirib və 30 sutka inzibati həbsə məhkum edilib.

Fevralın 24-də azadlığa çıxandan az sonra – fevralın 28-i o, yenidən inzibati qaydada 30 sutka həbs cəzası alıb.

Füzuli Hüseynov və Rəfael Hüseynzadə təkbaşına aksiyalar keçirməklə tanınırlar. Füzuli Hüseynov bir neçə dəfə siyasi məhbsulara azadlıq tələbi ilə Bakıda təkbaşına aksiya keçirib və inzibati həbslərə məhkum edilib.