“Qarabağ”ın qrupdakı rəqibləri bəlli oldu
Avqustun 30-da UEFA Avropa Liqasının qrup mərhələsinin püşkü atılıb. Novator.az-ın məlumatına görə, Azərbaycan təmsilçisi “Qarabağ” A qrupunda İspaniyanın “Sevilya”, Kiprin APOEL və Lüksemburqun “Düdelanj” komandalarına rəqib olub.
Qrup raundu sentyabrın 19-da start götürür. İki dövrədən ibarət mərhələdən 1/16 finala qrupda ilk iki yeri tutan komandalar çıxacaq.
“Sevilya” 1971-ci ildən keçirilən, 2008-ci ilədək UEFA kuboku adlanmış turnirdə hamıdan çox – 5 dəfə zəfər əldə edib.
APOEL-lə “Qarabağ” bu mövsüm Çempionlar Liqasının üçüncü raundunda oynayıb. Səfərdə 2:1 üstün olan ağdamlılar evdə 0:2 uduzaraq Avropa Liqasına köç edib.
“Düdelanj”la “Qarabağ” 2016-cı ildə Çempionlar Liqasının ikinci təsnifat mərhələsində qarşılaşıb. Ağdamlılar evdə 2:0 üstün gəlib, səfərdə heç-heçəyə (1:1) nail olub.
“Qarabağ” komandasının əsası 1951-ci ildə qoyulub. 1977-ci ilədək komanda “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb. 1 dəfə Azərbaycan SSR-in, 7 dəfə müstəqil Azərbaycanın çempionu olub.
Komanda 2014-2015, 2015-2016, 2016-2017, 2018-2019 mövsümlərində Avropa Liqasının qrup mərhələsində, 2017-2018 mövsümündə Çempionlar Liqasının qrup mərhələsində oynayıb.
1993-cü ildə Ağdam şəhəri işğal olunduqdan sonra komanda köçkün klub kimi fəaliyyət göstərir, hazırda Bakıda məskunlaşıb.
