Rusiya: bir ildə 584 minə yaxın ailə dağılıb
Rusiyada nikah və boşanma hesabatı açıqlanıb.
Novator.az xəbər verir ki, Federal Statistika Xidmətinin yeni hesabatına əsasən, 2018-ci ildə min nəfərə 4 boşanma düşüb, ümumilikdə 583 min 942 ailə dağılıb.
Statistikaya görə, ən az boşanma 1990-cı ildə qeydə alınıb. Həmin il min nəfərə 3,8 boşanma rəsmiləşib.
Ən çox boşanmanın 2002-ci ildə (min nəfərə 5,9 boşanma) müşahidə olunduğu bildirilir. 853 min 647 cütlüyün ayrıldığı o vaxtdan bəri boşanmalar tədricən azalır.
Federal Statistika Xidmətinin hesabatında 1990-cı ildən bəri evlilik sayının da azaldığı vurğulanır. 1990-cı ildə 1,3 milyon nikah qeydə alınıb, 2018-ci ildə bu rəqəm 893 minə enib.
Qeyd olunur ki, 2011-ci ildə min nəfərə 9,2 toy düşüb, 2018-ci ildə isə son 18 ilin ən az nikahı qeydə alınıb: min nəfərə 6,1 evlilik.
Səidə Hüseynova
