İqtisadiyyat 2,5%, orta maaş 8,2% artıb
Dövlət Statistika Komitəsi sosial-iqtisadi göstəricilər açıqlayıb. Novator.az bildirir ki, rəsmi məlumata görə, 2019-cu ilin yanvar-iyul aylarında Azərbaycanda 44 milyard 473,1 milyon manatlıq və ya əvvəlki ilin eyni dövrü ilə müqayisədə 2,5 faiz çox ümumi daxili məhsul (ÜDM) istehsal edilib. Əhalinin hər nəfərinə 4499,5 manat ÜDM düşüb.
Hesabata əsasən, yanvar-iyul aylarında 27,3 milyard manatlıq (2018-ci ilin müvafiq dövrü ilə müqayisədə 2,2 faiz çox) sənaye məhsulu istehsal olunub, qeyri neft-qaz sektorunda məhsul istehsalı 15,8 faiz artıb.
7 ayda ölkənin iqtisadi və sosial sahələrinin inkişafı üçün əsas kapitala 7 milyard 395,5 milyon manat vəsait yönəldilib. Sərmayənin 64,3 faizi məhsul istehsalı sahələrinə, 26,4 faizi xidmət sahələrinə, 9,3 faizi isə yaşayış evlərinin tikintisinə gedib. Daxili mənbələrdən əsas kapitala yönəldilmiş vəsait ümumi sərmayənin 70,8 faizini təşkil edib.
Yanvar-iyul aylarında pərakəndə ticarət şəbəkəsində satılmış məhsulların dəyəri əvvəlki ilin eyni dövrünün səviyyəsini müqayisəli qiymətlərlə 2,9 faiz üstələyərək 21,1 milyard manata çatıb. Ticarət dövriyyəsinin 10,6 milyard manatı ərzaq məhsulları, içkilər və tütün məmulatlarının, 10,5 milyard manatı qeyri-ərzaq məhsullarının payına düşüb.
Yanvar-iyul aylarında istehlak məhsulları və xidmətlər 2018-ci ilin müvafiq dövrünə nisbətən 2,7 faiz, o cümlədən ərzaq məhsulları, içkilər və tütün məmulatları 3,1 faiz, qeyri-ərzaq malları 1,3 faiz, əhaliyə göstərilən ödənişli xidmətlər 3 faiz bahalaşıb.
İyulun 1-nə ölkə iqtisadiyyatında muzdla çalışan işçilərin sayı 1 milyon 613,7 min nəfər olub, onların 903,4 min nəfəri dövlət sektorunda, 710,3 min nəfəri qeyri-dövlət sektorunda fəaliyyət göstərib.
Yanvar-iyun aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 8,2 faiz artaraq 585,2 manata yüksəlib.
