Yarım ildə 15,6 minədək şəxs pensiyaya çıxıb

2019-cu il yanvarın 1-dən Azərbaycanda pensiyaların elektron qaydada təyinatına başlanıb. Əmək və Əhalinin Sosial Müdafiəsi Nazirliyinin hesabatına görə, yanvar-iyun aylarında 15,6 minədək şəxsə yaşa görə pensiya təyin olunub, təyinatların 82 faizi avtomatlaşdırılmış qaydada həyata keçirilib. Qaydaya əsasən, pensiya təyinatı vətəndaşın yaşa görə pensiya hüququ yarandığı gün onun müraciəti olmadan, hər hansı sənəd təqdim etmədən, avtomatik aparılır və bu barədə özünə məlumat göndərilir.

Nazirlik bildirir ki, yenilik yaşa görə pensiya təyin olunanların sayının artmasına səbəb olub: “2019-cu ilin yanvar-iyun aylarında yaşa görə əmək pensiyası təyinatlarının sayı ötən ilin müvafiq dövrü ilə müqayisədə 67,7 faiz artıb”.

2017-ci il iyulun 1-dək Azərbaycanda kişilər 63, qadınlar 60 yaşda pensiyaya çıxırdı. Həmin vaxtdan bəri yaş həddi artırılır. 2021-ci il iyulun 1-dək kişilərin, 2027-ci il iyulun 1-dək qadınların pensiya yaşı 65-ə çatacaq.