UEFA Çempionlar Liqasında birinci mərhələ başa çatıb. Novator.az-ın məlumatına görə, Azərbaycanı təmsil edən “Qarabağ” komandası iyulun 17-si Bakıda Albaniyanın “Partizani” klubunu 2:0 hesabı ilə yenərək növbəti raunda adlayıb.

Tiranada keçirilən ilk oyunda hesab açılmamışdı.

“Qarabağ” ikinci mərhələdə (23-31 iyul) İrlandiyanın “Dandolk” komandası ilə üz-üzə gələcək. 1903-cü ildə yaradılan bu klub 13 dəfə İrlandiya çempionu olub.

Üçüncü mərhələdə (6-13 avqust) “Qarabağ”a Hollandiyadan “Ayaks”, dördüncü mərhələdə (20-28 avqust) İsveçrədən “Yanq Boyz” kimi klublar rəqib ola bilər.

17 sentyabr-11 dekabr arasında keçiriləcək qrup raunduna birbaşa vəsiqələri İspaniyanın “Barselona”, “Atletiko”, “Real”, “Valensiya”, İngiltərənin “Mançester Siti”, “Liverpul”, “Çelsi”, “Tottenhem”, İtaliyanın “Yuventus”, “Napoli”, “Atalanta”, “İnter”, Almaniyanın “Bavariya”, “Borussiya” (Dortmund), “Leypsiq”, “Bayer”, Fransanın PSJ, “Lill”, “Lion”, Rusiyanın “Zenit”, “Lokomotiv” (Moskva), Portuqaliyanın “Benfika”, Ukraynanın “Şaxtyor”, Belçikanın “Genk”, Türkiyənin “Qalatasaray”, Avstriyanın “Zalsburq” komandaları alıb.