Piketə icazə verilməyib
Bakı Şəhər İcra Hakimiyyəti Müsavatçı Gənclər Təşkilatının piketinə razılıq verməyib.
Partiyanın sözçüsü Mustafa Hacıbəylinin “Azadlıq” radiosuna dediyinə görə, aksiya İranla Ermənistanın birgə silah istehsalına qarşı keçirilməli idi. Lakin Bakı Şəhər İcra Hakimiyyəti gənclərə etirazlarını İran səfirliyinə yazılı şəkildə təqdim etməyi məsləhət görüb və aksiyaya razılıq verməyib.
Mustafa Hacıbəyli qeyd edib ki, Müsavat Partiyası cavab məktubunu sərbəst toplaşma hüququnun pozulması kimi qiymətləndirir və Azərbaycan hakimiyyətindən İranla Ermənistanın birgə silah istehsalına münasibət bildirməsini tələb edir.
“Turan” agentliyinin xəbərinə görə, iyunun 25-30-da Rusiya paytaxtı Moskvanın yaxınlığındakı Kubinka qəsəbəsində keçirilən “Ordu” beynəlxalq hərbi-texniki forumunda Ermənistan İranla birgə istehsal etdiyi Naim-802 radiolokasiya stansiyasını (RLS) nümayiş etdirib.
Xəbərə görə, RLS-dən uçan hədəflərin aşkarlanması, hədəfi məhv etmək məqsədi ilə koordinatların verilməsi üçün istifadə olunur. Naim-802-nin Yerevan Rabitə Vasitələri Elmi-Tədqiqat İnstitutunda hazırlandığı bildirilir.
