2019-cu ilin ilk yarısının xarici ticarət statistikası açıqlanıb. Novator.az bildirir ki, Dövlət Gömrük Komitəsinin hesabatına görə, yanvar-iyun aylarında Azərbaycanın xarici ticarət əməliyyatlarının həcmi 16 milyard 994,6 milyon dollar olub. Bunun 9 milyard 979 milyon dolları ixrac, 7 milyard 15,6 milyon dolları idxaldır.

Altı ayda 177 ölkə ilə ticarət əməliyyatı aparılıb, gömrük orqanları büdcəyə 2 milyard 65,2 milyon manat ödəyib.

İxracın 76,9 faizi xam neft və xam neft məhsulları, 2,6 faizi neft məhsulları, 10,5 faizi təbii qaz, 3,2 faizi meyvə-tərəvəz, 1 faizi plastmassa və ondan hazırlanan məmulatlardır.

İdxalın 17,8 faizi maşın, mexanizm, elektrik aparatları, avadanlıqlar və onların hissələri, 10,4 faizi yeyinti məhsulları, 7,6 faizi nəqliyyat vasitələri və onların hissələri, 6,5 faizi qara metallar və onlardan hazırlanan məmulatlar, 2,6 faizi plastmassa və ondan hazırlanan məmulatlar, 1,9 faizi əczaçılıq məhsulları, 1,9 faizi oduncaq və ondan hazırlanan məmulatlar, 1,6 faizi geyim əşyaları və geyim üçün ləvazimat kimi rəsmiləşib.

Yanvar-iyun aylarında ixracın 6,1 faizi MDB ölkələrinin, 53,3 faizi Avropa İttifaqı ölkələrinin, 40,6 faizi digər ölkələrin payına düşüb.

İdxalda MDB-nin payı 21,6 faiz, Avropa İttifaqının payı 16,6 faiz, digər ölkələrin payı 61,8 faiz göstərilir.

Yarım ildə əsas tərəfdaş İtaliya olub. Bu ölkə ilə ticarət dövriyyənin 17,6 faizi həcmində rəsmiləşib. Türkiyə 11,2 faizlə ikinci, Rusiya 8,1 faizlə üçüncüdür.

İxracda əsas ölkə İtaliya (28,1 faiz), idxalda İsveçrədir (14,4 faiz).