Dövlət Statistika Komitəsi yeni hesabatlar yayıb. Novator.az bildirir ki, rəsmi açıqlamaya görə, sənaye müəssisələri və fərdi sahibkarlar 2019-cu ilin yanvar-iyun aylarında 23,6 milyard manatlıq və ya 2018-ci ilin müvafiq dövrü ilə müqayisədə 1,8 faiz çox məhsul istehsal edib. Sənayenin neft-qaz sektorundan kənar bölümündə məhsul istehsalının 15,7 faiz artdığı vurğulanır.

Başqa bir hesabatda qeyd olunur ki, yanvar-iyun aylarında ölkənin iqtisadi və sosial sahələrinin inkişafı üçün əsas kapitala 6 milyard 131,6 milyon manat vəsait yönəldilib. Daxili mənbələrdən əsas kapitala yönəldilmiş vəsait ümumi sərmayənin 71,3 faizini təşkil edib. Sərmayənin ümumi dəyərində müəssisə və təşkilatların vəsaitləri 56,7 faiz, büdcə vəsaitləri 27,7 faiz, əhalinin şəxsi vəsaitləri 7 faiz, bank kreditləri 6,8 faiz, büdcədənkənar fondların vəsaitləri 1,4 faiz, sair vəsaitlər 0,4 faiz göstərilir.