Azərbaycan torpaqlarında qurulan işğalçı Dağlıq Qarabağ rejiminin “Mədəniyyət, Gənclər və Turizm Nazirliyi” yeni statistika yayıb. Novator.az bildirir ki, iddiaya görə, 2019-cu ilin ilk yarısında bölgəni 12 min 606 xarici turist ziyarət edib. Turistlərin sayının 2018-ci ilin yanvar-iyun ayları ilə müqayisədə 68,5% artdığı vurğulanır.

Altı ayda Dağlıq Qarabağda 17 yeni mehmanxana obyektinin istifadəyə verildiyi, belə obyektlərin sayının 78-ə (1828 çarpayı) yüksəldiyi qeyd olunur.

Qondarma rejimin “Ədliyyə Nazirliyi” isə yarım ildə bölgədə 327 nikah, 96 boşanma qeydə alındığını açıqlayıb.

1988-ci ildə Ermənistan Azərbaycanın Dağlıq Qarabağ vilayətini ələ keçirmək üçün təcavüzə başlayıb. 1991-ci ildə ermənilər Dağlıq Qarabağı “müstəqil dövlət” elan edib. 1994-cü ildə atəşkəslə dayanan işğalçı müharibədə Ermənistan Dağlıq Qarabağı (Xankəndi şəhəri, Şuşa, Xocalı, Xocavənd, Ağdərə rayonları) və onun ətrafındakı bölgələri (Laçın, Kəlbəcər, Ağdam, Füzuli, Cəbrayıl, Qubadlı, Zəngilan rayonları) ələ keçirib.