Qolsuz start
UEFA Çempionlar Liqasında Azərbaycanı təmsil edən “Qarabağ” komandası birinci mərhələnin ilk oyununu keçirib. İyulun 10-u Albaniyanın paytaxtı Tiranada “Partizani” klubu ilə görüşən “Qarabağ” qolsuz heç-heçəyə nail olub.
Cavab oyunu (17 iyul) Bakıya təyin edilib.
Novator.az bildirir ki, mərhələni keçsə, “Qarabağ” ikinci raundda (23-31 iyul) “Dandolk” (İrlandiya) – “Riqa” (Latviya) cütlüyünün qalibi ilə üz-üzə gələcək. İrlandiyadakı ilk oyunda hesab açılmayıb.
Üçüncü mərhələdə “Qarabağ”a Hollandiyadan “Ayaks”, dördüncü mərhələdə İsveçrədən “Yanq Boyz” kimi klublar rəqib ola bilər.
17 sentyabr-11 dekabr arasında keçiriləcək qrup raunduna birbaşa vəsiqələri İspaniyanın “Barselona”, “Atletiko”, “Real”, “Valensiya”, İngiltərənin “Mançester Siti”, “Liverpul”, “Çelsi”, “Tottenhem”, İtaliyanın “Yuventus”, “Napoli”, “Atalanta”, “İnter”, Almaniyanın “Bavariya”, “Borussiya” (Dortmund), “Leypsiq”, “Bayer”, Fransanın PSJ, “Lill”, “Lion”, Rusiyanın “Zenit”, “Lokomotiv” (Moskva), Portuqaliyanın “Benfika”, Ukraynanın “Şaxtyor”, Belçikanın “Genk”, Türkiyənin “Qalatasaray”, Avstriyanın “Zalsburq” komandaları alıb.
