Mərhum jurnalistin xatirəsinə həsr olunmuş kitab çapdan çıxıb
Mərhum jurnalist Zabil Müqabiloğlunun xatirəsinə həsr olunmuş “Son zəng” kitabı çapdan çıxıb.
Kitaba tanınmış ziyalıların, jurnalistlərin, dostlarının Zabil Müqabiloğlu haqda yazdıqları ürək sözləri, eləcə də Zabilin öz yazıları daxil edilib.
Kitabın hazırlanmasında və nəşr olunmasında deputat Qənirə Paşayevanın, Mətbuat Şurasının və şuranın sədri, deputat Əflatun Amaşovun, publisist, şair Umud Rəhimoğlunun, professor Qulu Məhərrəmlinin, tanınmış jurnalist, redaktor Famil Cəfərlinin, eləcə də bir sıra başqa şəxslərin dəstəyi olub.
İyulun 4-də Beynəlxalq Mətbuat Mərkəzində kitabın təqdimatı keçirilib.
“Yeni Müsavat” qəzeti xəbər verir ki, təqdimat mərasimində professor Qulu Məhərrəmli, Əflatun Amaşov, “525-ci qəzet”in baş redaktoru, Yazıçılar Birliyinin katibi Rəşad Məcid, Beynəlxalq Avrasiya Mətbuat Fondunun sədri Umud Rəhimoğlu, “Bizim Yol” qəzetinin baş redaktoru Bahəddin Həziyev, jurnalistlər Yadigar Məmmədli, Rey Kərimoğlu, Jalə Mütəllimova və başqaları çıxış ediblər. Onlar öz qısa ömründə Zabil Müqabiloğlunun maraqlı, mübarizələrlə, yaradıcılıq uğurları ilə, ağrılarla, itkilərlə dolu illər yaşadığını, insanların yaddaşında müsbət obrazı ilə qaldığını vurğulayıblar.
Tədbirdə Zabil Müqabiloğlu ilə bağlı videoçarx da göstərilib. Mərhum jurnalistin bacısı Sevinc Əliyeva Zabilin xatirəsinə göstərilən hörmətə, kitabın nəşrində göstərdikləri köməyə, təqdimatda iştiraka görə təşəkkürünü bildirib.
Kitab “Qanun” nəşriyyatında çap olunub.
Zabil Müqabiloğlu 1977-ci il noyabrın 17-də Zəngilan rayonunun Babaylı kəndində anadan olub. Bakı Asiya Universitetinin jurnalistika fakültəsini bitirib. 1996-1998-ci illərdə hərbi xidmətdə olub. 1998-ci ildən mətbuatda çalışıb. “525-ci qəzet”də, “Avropa”, “Tərcüman”, “Yeni Müsavat” qəzetlərində işləyib. Son iş yeri təsisçisi olduğu Gunxeber.com saytı olub.
Zabil Müqabiloğlu 2017-ci il fevralın 26-da vəfat edib.
Zabil Müqabiloğlunun “Sonuncu zəng” yazısı
Zabildən qalan baməzə söhbətlər…
Zabil Müqabiloğlunun kitabı nəşrə hazırlanır
