Rusiyalı jurnalist İvan Qolunovun həbsi iki generalın istefaya göndərilməsi ilə nəticələnib.

İvan Qolunov “Meduza” internet nəşrinin təhqiqatçı jurnalistidir, Rusiya hakimiyyətinin ali dairələrinin korrupsiyaya qurşanması barədə yazıların müəllifi kimi tanınır.

1983-cü il təvəllüdlü İvan Qolunov iyunun 6-sı paytaxt Moskvada tutulub. Polis jurnalistin üstündən və evindən narkotik maddə bağlamalarının çıxdığını iddia edib.

Bu həbs Rusiya ictimaiyyətinin sərt etirazına səbəb olub. İyunun 11-də İvan Qolunov sərbəst buraxılıb, cinayət işi xətm olunub.

Novator.az bildirir ki, Rusiya prezidenti Vladimir Putin iyunun 13-də bu qalmaqala görə iki vəzifəli şəxsi cəzalandırıb. Dövlət başçısı daxili işlər nazirinin təqdimatını nəzərə alaraq Narkotiklə Mübarizə Baş İdarəsinin paytaxt üzrə rəisi Yuri Devyatkini və Moskva polisinin Qərb İnzibati Dairəsi üzrə rəisi Andrey Puçkovu işdən çıxarıb. Onların hər ikisi polis general-mayorudur.