Bu dağ yanar
AZƏRTAC “Yanardağ” Dövlət Tarix-Mədəniyyət və Təbiət Qoruğunun fotolarını yayıb.
Abşeron rayonunun Məmmədli kəndində yerləşən qoruq əsaslı şəkildə təmir və bərpa olunandan sonra iyunun 12-də açılıb. Mərasimə prezident İlham Əliyev və birinci xanım Mehriban Əliyeva qatılıb.
Dövlət Turizm Agentliyinin sədri Fuad Nağıyev bildirib ki, qoruq yeni konsepsiyaya uyğun olaraq bərpa edilib. Yenidənqurma işləri çərçivəsində ümumi sahəsi 64,55 hektar olan ərazidə 3 tematik zonadan ibarət muzey, açıq hava konsertləri üçün nəzərdə tutulan 500 nəfərlik amfiteatr, sənətkar emalatxanaları və mağazalar, keramika, şüşə, taxta və parça kimi təbii materiallardan hazırlanan suvenirlərin satışı məntəqəsi, parkinq turistlərin ixtiyarına verilib.
Həmçinin ərazidə tapılan qədim daşlar və sənətkarlıq nümunələrinin, qaval daşının nümayiş etdirildiyi açıq hava muzeyi yaradılıb.
Qoruq ərazisində yerli gənc rəssamların əsərlərinin nümayiş olunduğu kafe, əyləncə zonası, uşaqlar üçün oyun meydançası fəaliyyət göstərəcək.
Fiziki məhdudiyyətli şəxslərin Yanardağ alovunun ətrafına enməsi üçün xüsusi yol çəkilib.
Bütövlükdə qoruq ərazisi abadlaşdırılaraq müxtəlif ağaclar əkilib.
Qoruğun tərkibində Yanardağ – əbədiyaşar alov təbii abidəsi ilə yanaşı digər maddi-mədəni irs nümunələri və təbiət abidələri də var. Bu abidələrə “Qurd yuvası” adlanan ilkin ibtidai icma dövrünə aid mağaralar, çoxəsrlik tarixə malik və qədim sanduqələrlə zəngin iki qəbiristanlıq, müalicəvi kükürdlü su bulaqları, hələ də aktiv fəaliyyətdə olan Qırməki palçıq vulkanı, Əlidaşı piri, Kardaşı iri təbii qaya daşları, Qırməki vadisi, qədim kurqan aiddir.
