Sultanlığa etirazlar
Qazaxıstanda iyunun 9-u və 10-da keçirilmiş etiraz aksiyalarında tutulanların sayı açıqlanıb.
Aksiyalar Qazaxıstanın Demokratik Seçimi təşkilatının çağırışı ilə keçirilib. Bu qurumun lideri Muxtar Ablyazov Fransada yaşayır. Təşkilat 9 iyun prezident seçkisini boykota çağırmışdı və onun nəticələrini qəbul etmir.
Novator.az-ın məlumatına görə, iyunun 11-də Qazaxıstanın Daxili İşlər Nazirliyi bəyan edib ki, paytaxt Nur-Sultanda və Almatı şəhərində aksiyalara qatılan 700 nəfərə yaxın şəxs tutulub, onların 550-yə qədəri məsuliyyətə cəlb olunub.
Bu il martın 20-də Qazaxıstan prezidenti Nursultan Nazarbayev istefa verib.
1940-cı il təvəllüdlü Nursultan Nazarbayev Qazaxıstana 1989-cu il iyunun 22-dən (əvvəl Qazaxıstan Kommunist Partiyası Mərkəzi Komitəsinin birinci katibi, sonra eyni zamanda Qazaxıstan SSR Ali Sovetinin sədri kimi) başçılıq edib, 1990-cı ildən prezident postunu tutub.
Dövlət başçısı postundan getsə də, Nursultan Nazarbayev hakim Nur Otan Partiyasının lideri kimi ölkəni nəzarətdə saxlayır.
Martın 20-də Qasım-Comərd Tokayev Qazaxıstanın ikinci prezidenti elan edilib. Həmin günədək Qasım-Comərd Tokayev parlamentin yuxarı palatasının – Senatın sədri olub.
İyunun 9-da növbədənkənar prezident seçkisi keçirilib. Nur Otan Partiyasının namizədi olan Qasım-Comərd Tokayevin həmin seçkini 70,7% səslə udduğu açıqlanıb.
1953-cü ildə doğulan Qasım-Comərd Tokayev əvvəllər xarici işlər naziri (1994-1999, 2002-2007), baş nazir (1999-2002), Senatın sədri (2007-2011, 2013-2019), BMT baş katibinin müavini (2011-2013) vəzifələrini tutub.
