Həkimlər İsgəndər Həmidova nə məsləhət görüb?
Türkiyənin İstanbul şəhərində müayinə və müalicə kursunu başa vuran sabiq daxili işlər naziri İsgəndər Həmidov iyunun 8-də Bakıya dönüb. İsgəndər Həmidovun qohumu Novator.az-a deyib ki, sabiq nazirin səhhəti normaldır, həkimlər ona təmiz havada çox olmağı məsləhət gördüyü üçün Şamaxıya getməyə hazırlaşır.
Ürək xəstəliyindən əziyyət çəkən İsgəndər Həmidov ötən ilin dekabrında Bakıda Tibb Universitetinin Tədris Cərrahiyyə Klinikasında, sonra ev şəraitində müalicə alıb. Sabiq nazir Türkiyəyə bu il mayın 20-də aparılmışdı.
İsgəndər Həmidov 1948-ci ildə Kəlbəcərin Bağlıpəyə kəndində doğulub. İqtisadiyyat və hüquq sahələri üzrə iki ali təhsil alıb. Uzun illər daxili işlər orqanlarında xidmət edib. Milli azadlıq hərəkatının öncül şəxslərindəndir. 1990-cı ildən parlamentin üzvü olub. 1992-1993-cü illərdə Azərbaycanın daxili işlər naziri postunu tutub. 1995-2003-cü illərdə həbsdə yatıb.
İsgəndər Həmidov bu il yanvarın 26-sı Bakıda təsis olunan Azərbaycan Xalq Hərəkatı adlı müxalif blokun öncül şəxslərindəndir.
İsgəndər Həmidov xəstəxanaya yerləşdirilib
İsgəndər Həmidov siqareti tərgitdi
