Tutulanlar sərbəst buraxılıb
Müsavat Partiyasının və Demokratik Qüvvələrin Milli Şurasının mayın 28-də paytaxtın Novxanı qəsəbəsində ayrı-ayrı saatlarda keçirdikləri aksiyalar zamanı tutulanların hamısı sərbəst buraxılıb.
Aksiyalar Respublika Günü münasibətilə keçirilib və hər ikisində yürüş-mitinqdən ibarət olub.
Həm Milli Şuranın, həm də Müsavat Partiyasının üzvləri Novxanının girişindən Azərbaycan Xalq Cümhuriyyətinin qurucu lideri Məhəmməd Əmin Rəsulzadənin qəsəbədəki heykəlinə doğru yürüş edərkən onlarla polislər arasında insidentlər yaşanıb. Müsavat Partiyasının yürüşündə 4 nəfər, Milli Şurasının yürüşündə isə 8 nəfər tutulub.
Müsavat başqanının müavini Gülağa Aslanlı “Turan”a deyib ki, sözügedən 4 nəfər partiyanın Cəlilabad rayon təşkilatının üzvləri olub və onların hamısı hər hansı inzibati cəza tətbiq edilmədən sərbəst buraxılıb.
Milli Şuranın yürüşündə tutulan 8 nəfərdən biri də şuranın Koordinasiya Mərkəzinin üzvü Tofiq Yaqublu olub.
Tofiq Yaqublu “Turan”a bildirib ki, onları Abşeron Rayon Polis İdarəsinə aparıblar, bir neçə saat saxladıqdan sonra sərbəst buraxıblar: “Amma elə düşünmək lazım deyil ki, məsələ bununla bitib. Polis idarəsində saxlanılma ilə bağlı protokollar tərtib edilib və həmin işlər məhkəmələrə verilə də bilər”.
