Seçicilərin sayı açıqlanıb
Mayın 29-da Mərkəzi Seçki Komissiyası (MSK) seçicilərin sayını açıqlayıb. Rəsmi hesabata görə, ölkə üzrə siyahıya 5 milyon 212 min 902 nəfər daxil edilib. Onların 49,2 faizi kişi, 50,8 faizi qadınlardır.
İlin əvvəlindən seçici siyahıları hər bir seçki məntəqəsi üzrə dəqiqləşdirilərək fevralın 5-dək dairə seçki komissiyalarına verilib. Dairə seçki komissiyaları seçici siyahılarını dəqiqləşdirdikdən sonra aprelin 5-dək MSK-ya təqdim ediblər. Bundan sonra MSK seçicilərin daxil olduğu məlumat bazasını dürüstləşdirərək prosesə yekun vurub.
Seçici siyahılarının dəqiqləşdirilməsi Daxili İşlər Nazirliyi və Ədliyyə Nazirliyinin müvafiq orqanları, o cümlədən yerli icra strukturları və bələdiyyə qurumları ilə sıx əməkdaşlıq şəraitində aparılıb, bu işə aşağı seçki komissiyalarının otuz mindən artıq üzvü cəlb olunub.
Dekabrın 27-si Azərbaycanda bələdiyyə seçkiləri keçirilməlidir. Bu, ölkədə bələdiyyə institutu yaradılandan bəri beşinci seçkilər olacaq.
Azərbaycanda 1606 bələdiyyə var. Əhalisi 500-dən az olan ərazilərdə 5 bələdiyyə üzvü; 999-dək olan ərazilərdə 7 bələdiyyə üzvü; 4999-dək olan ərazilərdə 9 bələdiyyə üzvü; 9999-dək olan ərazilərdə 11 bələdiyyə üzvü; 19999-dək olan ərazilərdə 13 bələdiyyə üzvü; 49999-dək olan ərazilərdə 15 bələdiyyə üzvü; 99999-dək olan ərazilərdə 17 bələdiyyə üzvü; 299999-dək olan ərazilərdə 19 bələdiyyə üzvü seçilir.
